Həmid Hüseyn oğlu Şabanov 1938-ci il martın 14-də Bolnisi rayonunun Dəmirli kəndində anadan olub. 1946-cı ildə Dəmirli kəndindəki ibtiadi məktəbin birinci sinfinə gedib, 1957-ci ildə isə Darvaz orta məktəbini bitirib. 1957-ci ildə H.Zərdabi adına Kirovabad (Gəncə) Pedaqoji İnstitutunun fizika-riyaziyyat fakültəsinə daxil olub, 1962-ci ildə ali təhsilini başa vurub.

Rafiq Hümmət 1965-ci il fevralın 13-də Borçalıda - Gürcüstanın Bolnisi rayonunun Darvaz kəndində anadan olub. 1982-ci ildə doğma kəndində orta məktəbi, 1991-ci ildə S.S.Orbeliani adına Tbilisi Dövlət Pedaqoji Universitetinin filologiya fakültəsini bitirib. Həmin ildən etibarən bir müddət "Sovet Gürcüstanı" (indiki "Gürcüstan") və Rustavi şəhərində nəşr olunan "Region" qəzetlərində çalışıb. 1998-ci ildən bir neçə il Bakıda yaşayıb və burada bir çox mətbu orqanlarla, o cümlədən "Şərq", "Faktor", "Yeni Azərbaycan" qəzetləri ilə əməkdaşlıq edib, "Milliyət" qəzetinin baş redaktoru olub.

Şamil Həsən oğlu Əliyev 1936-cı il iyun ayının 5-də Bolnisi rayonunun Darvaz kəndində anadan olub. 1954-cü ildə Darvaz kənd orta məktəbini bitirib və elə həmin ildə də Azərbaycan Tibb İnstitutunun müalicə-profilaktika fakültəsinə daxil olub.

Farmiz Şamil oğlu Əliyev 1972-ci il oktyabr ayının 19-da anadan olub. 1989-cu ildə Dmanisidə orta məktəbi bitirib. Atası Borçalıda tanınmış həkim olan Şamilin və böyük qardaşı Fuadın yolu ilə gedərək həkim olmağı qarşısına məqsəd qoyub və 1990-cı ildə Tümen Tibb Akademiyasının müalicə işi fakültəsinə daxil olub. 1996-cı ildə ali təhsilini başa vuraraq endoskopist ixtisasına yiyələnib.