Qış gəlir, zirvəndə qarından ötrü,
Ürəyim göynəyir, telli Darvazım.
Burnumda yovşanın, mamırın ətri,
Pərişan halımdan bəlli, Darvazım.
Görən, tək mənəmmi dərdi qövr edən,
Hıçqıra - hıçqıra dözən, səbr edən,
Şindiyə söykənib, yurdu seyr edən,
Otuziki para elli Darvazım.
Bineydən izimin sayası Türkdən,
Abırı, isməti, həyası Türkdən,
Geninin qanının mayası Türkdən,
Ərdən, ərənlərdən döllü Darvazım.
İllərdi sənsizəm, olmuşam nalan,
Çırpınır qəfəsdə bu şair balan.
Qarsdan, Ərdəhandan havasın alan,
Aranlı, yaylaqlı, çöllü Darvazım.
Bulaqların dodağımın sevinci,
Al günəşin otağımın sevinci,
Ailəmin, ocağımın sevinci,
Aynası dumandan tüllü Darvazım.
Təbriz İman qəm becərib, qəm dərib,
Kim deyir ki, qəmlərini kəm dərib.
Sənsiz vətəndə də qəribəm, qərib,
A mənim çiçəkli, güllü Darvazım.
